चाकण मध्ये उद्धव ठाकरे - एकनाथ शिंदे एकत्र स्थानिक निवडणुकीत अनपेक्षित राजकीय चित्र

 महाराष्ट्रात शिवसेना फुटल्यानंतर उद्धव ठाकरे आणि एकनाथ शिंदे यांच्यातील मतभेद अनेकदा उघडपणे दिसून आले. दोन्ही बाजूंनी स्वतंत्र भूमिका घेत राज्यभर संघर्षात्मक वातावरण तयार झाले होते. मात्र स्थानिक स्वराज्य संस्थांच्या निवडणुकीच्या तयारीदरम्यान चाकणमध्ये मात्र अगदी अनपेक्षित घडामोड घडली आहे. येथे दोन्ही गटातील नेते एका उमेदवाराच्या मागे एकत्र उभे राहिल्याने संपूर्ण राज्यात चर्चा रंगली आहे. चाकण नगरपरिषदेच्या नगराध्यक्ष पदासाठी शिंदे गटाच्या मनिषा गोरे यांनी अर्ज भरताना, ठाकरे गटाचे आमदार बाबाजी काळे आणि शिंदे गटाचे आमदार शरद सोनवणे दोघेही उपस्थित होते. त्यामुळे शिवसेनेच्या दोन्ही गटांनी स्थानिक पातळीवर केलेल्या सहकार्याने आश्वर्य व्यक्त केले जात आहे.

या निर्णयामागील कारणाबाबत बोलताना आमदार बाबाजी काळे यांनी स्पष्ट केले की, दिवंगत आमदार सुरेश गोरे यांच्या निधनानंतर ही पहिली मोठी निवडणूक होत आहे. त्यांच्या कार्याचा आणि योगदानाचा आदर म्हणून त्यांच्या पत्नी मनिषा गोरे यांना पाठिंबा दिला गेला आहे. काळे यांच्या म्हणण्यानुसार हा पाठिंबा केवळ भावनिक आणि स्थानिक श्रद्धेचा भाग आहे, त्याला राजकीय युती समजू नये. उद्धव ठाकरे आणि संपर्क प्रमुख सचिन अहिर यांनीही स्थानिक स्वराज्य संस्थांच्या निवडणुकांमध्ये निर्णय स्थानिक कार्यकर्त्यांनी घ्यावा, अशा स्पष्ट सूचना दिल्या आहेत. त्यामुळे हा निर्णय चाकणपुरताच मर्यादित असून तालुक्यातील इतर ठिकाणी दोन्ही गट स्वतंत्रपणे स्पर्धेत उतरणार असल्याचे त्यांनी सांगितले.

चाकणमधील या सहकार्याची चर्चा रंगत असतानाच दुसरीकडे मुंबईत शिंदे गटात मात्र नाराजीचे सूर उमटले होते. मुंबईमहानगरपालिकेच्या निवडणुकीची तयारी सुरू असताना काही नगरसेवक आणि इच्छुक पदाधिकाऱ्यांनी शिंदे यांच्याकडे तक्रारी मांडल्या होत्या. काही आमदारांकडून त्यांच्या जवळच्या व्यक्तींना तिकीट मिळावे म्हणून दबाव टाकला जात असल्याचा आरोप नगरसेवकांनी केला. यामुळे त्यांच्या कामात अडथळे येत असल्याने काही विभागांमध्ये नाराजी वाढली होती. शिंदे गटात अनेकजण नुकतेच सामील झाल्याने त्यांना योग्य स्थान मिळावे, अशी अपेक्षा व्यक्त करण्यात येत होती.